楊佩佩戲劇館

袁詠儀：我係惹是非
 
2000/03/19
 
近日招惹到不少是非的袁詠儀，今日出席《笑傲江湖》宣傳活動時打破沉默，侃侃回應有關事件，更承認自己的確時常招惹是非。靚靚說：「我師父都話我係惹是非，無得化解的。因為是非唔多唔少都係因為我的性格，但師父話性格係無得改，只可以控制。」 
靚靚承認自己性格率直，有時又貪玩，所以可能觸怒了別人也不知道。她說：「好似上次潑水咁，我個陣只係見到所有人圍埋一齊，咁諗住玩玩，當時唔諗過咁多事，會唔會影響人之類。不過事後我就會諗囉，我知道咁潑係不對，因為可能會潑到其他人，整濕記者的攝影器材。但當時唔記得囉。其實入行以來呢樣野都幾累事，所以唯有玩少些啦。」
 
靚靚續稱由於新劇即將上演，所以她亦收多了Fans的禮物。而最近她發生不如意事，她們都很支持。靚靚說：「我覺得她們有少少我做咩都話對個隻。」不過靚靚說亦有Fans會因她「唔生性」而鬧她：「通常她們係聯埋保姆話我，她們會叫我唔好再講咁多，費事我失禮人。她們話我係因為她們知我係受硬唔受軟，有時要喝住我先得。（咁話你多定係支持你多？）咁支持我的Fans多些。」
 
其實Fans都很疼愛和關心靚靚，不時Send E-mail安慰她，支持她。靚靚說：「我鍾意一些忠心的Fans。好似我有幾個入行以來一直支持我的Fans，我們見面雖少，但她們都會講我知她們日常生活的事，到我生日又會留Message畀我，寄咭畀我。有時她們在報紙上見到我多了暗瘡，又會煲些湯水給我。所以有時唔開心，都係她們令我無事。」